فكرة ان الانسان يصلح من نفسه دى اصلا هى سبب الثواب ومش بس انك اتصحلت .. ان قضية الاصلاح شغلاك و انك بتصلح وبتسعى .. حتى لو بتحاول و متقدرش .. بتقوم وترجع تقع تانى .. مش دى القضية .. القضية فى الاستمرار و الرغبة الجادة فى الاصلاح فى كل محاولة .. ودى طبعا حاجات العالم بيها فى كل شخص هو الخالق عز وجل
و من هنا قلت اشوف و ادور على اصل الشرور فى ابن آدم .. ايه اكتر حاجة لو اتصلحت بتأثر فى سرعة اصلاح باقى الحاجات .. ايه اكتر خلق يؤدى الى مزيد من السوء و الانحدار .. لقيت للاسف انه الكذب!
"ليس الكذب شيئا يستهان به فهو أس الشرور ورذيلة الرذائل فكأنه أصل والرذائل فروع له، بل هو الرذائل نفسها وإنما يأتي في أشكال مختلفة ويتمثل في صور متنوعة." مصطفى لطقى المنفلوطى
للاسف الاسيف الكذب زى المنحدر .. الواقف على اوله بيكمل الانحدار .. سواء باستمراء خلق الكذب ده نفسه و التعود عليه او باستتسهال اخلاق سيئة كتير هو بيجرجرل الانسان لهاز
الكذب له محورين: محوردينى و محور نفسى .. وعلشان يتعالج صح لازم السعى فى المحورين دول .. واحد لوحده مش كفاية او على الاقل مش بالقوة المطلوبة
الواحد بيكذب لانه مش راضى عن حاله فبيحاول يجمله .. او عايز ياخد بدون تعب او عايز ياخد اللى مش حقه .. او عايز يوقع الناس فى بعض فيكسب سيطرة
مهم معرفة السبب النفسى للكذب علشان نعرف نصلحه .. هنصلحه بالدين طبعا بس باى محور فى الدين؟
فى رأى الرضا اللى اصله الايمان اليقينى مش ايملن اللسان .. ايمان التسليم والطاعة لله .. مش هوى النفس .. احد اول محاور الدين فى اصلاح الكذب
فى علم النفس .. النفس دى 3 . واحدة فيهم هدفها ان الانسان يفضل تحت ميطلعش لفوق ابدا .. تلاقيها فى الاصل بتشدك الانسان بالكسل .. ده صعب انت لسة هتعمل كده .. ده اسهل! قفيلاقى الكذب يساعده على عدم بذل الجهد للحصول على ما يريد بعد شوية يبقى فيه غش و افتراء و بهتان .. و ده كله علشان الانسان عايز و بس بدون ما يدى او يتعب التعب اللى يخليه ياخد اللى عايزه!
و دايما بتبدأ بالكذب لانه بيسهل مواقف كتير الصدق فيها عايز مجهود و تعب .. فتلاقيها بتجرجرك على الاسهل دوما
خلينا فاكرين ان الاجر على قدر المشقة .. كل مت تتعب كل ما ثوابك يزيد .. فمبدئيا كده بلاش استسهال و بلاش كسل وراحة كتيىر
علم النفس بقى بيقول .. حب نفسك زى ما هى بعيوبها بفشلها باخطائها .. ارضى عنها و اعترف باخطائها علشان تقدر تصلحها
هو مقال قديم كتبته من 7 سنين .. قلت افكر نفسى ونفتكره مع بعض .. و لا تنسونى من صالح دعائكم ..
و لتنذكر جميعا "و تحسبونه هين وهو عند الله عظيم"
كمان سيدنا محمد صلى الله عليه وسلم اسمه الصادق .. و مين اللى مسميه كده .. دول كفار قريش .. اعدائه اصلا قالوا عليه صادق .. من كتر صدقه حتى اعدائه قالوها عنه مش هوه ده قدوتنا و معلمنا و هادينا
سبحانه ربى لما وصفه قال عنه "و إنك لعلى خلق عظيم"
نبدا المقال
تساوى كام دى
مش عارفة ليه بيلح عليا دلوقتى اتكلم فى موضوع يمكن كتير مننا شايفه بسيط
و يمكن فى ناس بتعمل كده من غير ما تاخد بالها انه غلط
و فيه ناس من كتر ما عملت كده بقى ده العادى بتاعها
الحديث النبوى الشريف اللى كلنا اتعلمناه و احنا صغيرين و حافظينه صم
قال رسول الله صلى الله عليه و سلم "إن الصدق بر وإن البر يهدى إلى الجنة وإن العبد ليتحرى الصدق حتى يكتب عند الله صديقا وإن الكذب فجور وإن الفجور يهدى إلى النار وإن العبد ليتحرى الكذب حتى يكتب كذابا"
صدق رسول الله صلى الله عليه و سلم
فضلت ادور على اسناد الحديث عشان اتأكد من كل كلمة فى المقال قبل ما ابدأ
حَدَّثَنَا الْحُسَيْنُ بْنُ مُحَمَّدٍ الْعَسْكَرِيُّ ، حَدَّثَنَا الْبَاغَنْدِيُّ ، حَدَّثَنَا أَبُو بَكْرِ بْنُ أَبِي شَيْبَةَ ، حَدَّثَنَا أَبُو الأَحْوَصِ سَلامُ بْنُ سُلَيْمٍ ، عَنْ مَنْصُورٍ ، عَنْ أَبِي وَائِلٍ ، عَنْ عَبْدِ اللَّهِ بْنِ مَسْعُودٍ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " إِنَّ الصِّدْقَ بِرٌّ ، وَإِنَّ الْبِرَّ يَهْدِي إِلَى الْجَنَّةِ ، وَإِنَّ الْعَبْدَ لَيَتَحَرَّى الصِّدْقَ حَتَّى يُكْتَبَ عِنْدَ اللَّهِ صِدِّيقًا ، وَإِنَّ الْكَذِبَ فُجُورٌ ، وَإِنَّ الْفُجُورَ يَهْدِي إِلَى النَّارِ ، وَإِنَّ الْعَبْدَ لَيَتَحَرَّى الْكَذِبَ حَتَّى يُكْتَبَ عِنْدَ اللَّهِ عَزَّ وَجَلَّ كَذَّابًا " . مُسْلِمٌ عَنْ أَبِي بَكْرٍ
و لقيت كمان كلام كبير قوى فى نفس الموضوع " الكذب" حديث آخر
لمالك في الموطأ عن صفوان بن سليم مرسلا أو معضلا: قيل: يا رسول الله، المؤمن يكون جبانا؟ قال: نعم، قيل: يكون بخيلاً؟ قال: نعم، قيل: يكون كذابا؟ قال: لا. ورواه ابن أبي الدنيا في الصمت مقتصرا على الكذب، قال عمر بن الخطاب رضي الله عنه: لا تجد المؤمن كذابا.
وروي عن أبي بكر مرفوعا : " إياكم والكذب فإنه مجانب للإيمان " ، أخرجه ابن عدي ، وصوب الدارقطني وقفه ، كما رواه أحمد ، وابن أبي شيبة
وروى ابن عبد البر عن عبد الله بن جراد : " أنه سأل النبي - صلى الله عليه وسلم - هل يزني المؤمن ؟ قال قد يكون ذلك ، قال : هل يكذب ؟ قال : لا " ، وللبزار ،
وأبي يعلى عن سعيد بن أبي وقاص رفعه : " يطبع المؤمن على كل خلقه غير الخيانة والكذب ، وضعف البيهقي رفعه ، وقال الدارقطني : الموقوف أشبه بالصواب ، قال غيره : ومع ذلك فحكمه الرفع على الصحيح ; لأنه مما لا مجال للرأي فيه ، انتهى .
يا نهار ابيض !!!
هوه ايه فى الدنيا ممكن يستاهل انى اتكتب عند ربنا " الله جل جلاله" كذاب !!!!
مين يستاهل فى الدنيا دى اكذب عشانه !!!!
بقى اللى خلقنى و رزقنى و هيحاسبنى و اللى عنده الجنة بكل نعيمها .... و اللى برده عنده جهنم بكل عذابها
مش فارق معايا كل ده و برده مبيهمنيش و بكذب !!!
تساوى كام انى اتكتب عنده جل جلاله كذاب !!! عشان مين يعنى لما يتقال اسمى فى الملأ الاعلى يتقال الكذاب فلان !!!
ده الواحد مبيتسحملهاش من واحد صحبه فى الدنيا و لو حتى على سبيل الهزار !!!!
تخيل كده انك سامع بودنك صوت الملايكة و هم بيقولوا فلان الفلانى ... اه ده مكتوب عندنا هنا انه كذاب !!!!
يااااااااه تقيلة قووووى !!!
طيب انا مش بكذب خالص ...
انتى جميلة و حلوة ... عاملة ايه بقى ؟
هيه هيه عاملة بامية هيه هيه
هوه انتى فعلا عاملة بامية النهادرة؟
لا ده انا بهزر معاكى
اهلا و سهلا هوه ده اللى مش بتكذبى !!!!
لا يا جميلة دى كده كدبة .... مش انتى قلتى حاجة مش حقيقية ... تبقى كدبة !!! و تسجل الملايكة انها كدبة و بعدين ناخد بقى على كده و يبقى هوه ده العادى!!!!
طب على فكرة انا مش يكذب .. انا بفخم الكلام بس !!
يعنى ايه مش فاهمة ؟
يعنى لو اشتريت حاجة بقرش بقول اننا جبتها بجنيه ... و ايه يعنى ... لو نضفت سجادة بقول روقت الشقة .. ايه يعنى .. بحكى كتير حاجات محصاتش من كتر ما نفسى تحصل .. ده مش كدب ده ... ده بس تفخيم !!!!
لا استوب هنا و نركز ... ده طبعا كذب .... ايوة كذب طبعا !!!!
و خلى بالك .. هل يكب الناس فى النار الا حصاد السنتهم!
طيب انا صحيت من النوم متأخر النهاردة و رحت الشغل متأخر و لما رحت قلتلهم ان ماما كانت تعبانة الصبح و عشان كده اتأخرت !!
طبعا كدبة .... و كمان ادعاء مرض
يا اخوانا الموضوع كبير ... و الله كبير جدا
بس نفتكر كده اننا و احنا قاعدين ... فيه ملايكة شغالين كتابة كل كلمة بنقولها
"ما يلفظ من قول الا لديه رقيب عتيد"
(فلان ابن فلان كدبة ... اتنين .. تلاتة ...... )
لغاية ما يكتبوا .... فلان ابن فلان .... كذاب !!!!! و خلاص كده بيترفع التقرير لرب العباد و فيه انك حضرتك كذااااااااب !!!!
و كل ده عشان بتهزر او بتتجمل .. او خايف من فلان ابن فلان اللى هوه بنى آدم زيك برده ! ميمنعش برده شوية غل من فلان مش عايزه يبقى احسن منى لما اقول كذب عنه "كده ده بقى اسوه افتراء لو قلت حاجة مش موحودة او بهنان لو موجودة"
او كبر " ازاى ده يعرف اكتر منى ابدا ده كلامه غلط كلامه كذب"
او ادعاء" سمعت حاجة من حد بتقوم تقولها وتقول انك صاحبها .. سواء فكرة او كلمة او تصرف او حتى هدية"
.. او مصلحة من شخص "فلان ده ممكن يعملى و يسويلي لو انا قلت كذا
رجاء لنفسى اولا و لكل حد قرأ الكلمات اللى فوق.. عدى اى كلمة هتقولها على فلتر العقل ابو ضمير .. شوفى كده هيعديها ولا لأ .. و اذا لأ بلاش إعادة و محايلة و تحايل .. الموضوع فعلا مش سهل و مش بسيط
يا ريت اكون وصلت الفكرة و المعنى ..
و يا ريت نبدأ من ساعة ما قراينا المقال ... قول لربك ... خلاص انا فقت ...
قله يا ربى عينى اكون زى ما تحب
يا رب نفسى تنادى فى ملايكتك و تقولهم ... يا ملايكتى انى احب فلان ابن فلان ... فاحبوه
يا ربى نفسى الملايكة قول فلان ابن فلان .. صادق صديق صدوق
يا رب اعينا ان نكون لك عبيدا ترضيك .. اعنا على تحكيم كتابك و سنة نبيك
صلى الله عليه و سلم
امة الله
م. سالى محمد غانم
7-5-2019
