عندنا فى الكلية كان فى امتحانات اوبن بوك open book يعنى تدخل الامتحان و معاك الكتاب
و كمان كان فيه امتحان اوبن تايم open time يعنى تقعد فى الامتحان زى ما انت عايز
و ساعات كان الدكتور يقول ممكن تتناقشوا مع بعض لو حبيتوا ... آه و الله فعلا
و مع ذلك كان فيه نا بتسقط !!!
تمام زى امتحان الدنيا
ما هم اوبن بوك ... يعنى معاك الكتاب (القرآن و السنة) و اوبن تايم (طول العمر) و ممكن تسأل زمايلك (لا خاب من استشار)
و مع ذلك فى ناس هتدخل النار !!!
طيب ليه يا ترى ؟؟؟؟؟؟؟؟
علشان مش كل الناس بتفتح الكتاب فى الامتحان ... فى ناس بتجاوب باللى بيجى على بالها و خلاص !!!
و ساعات تلاقى ناس بتفهم اللى مكتوب فى الكتاب على مزاجها و يجابوا كده على مزاجهم و خلاص !!!
و ساعات ناس تانية مكسلة تفتح الكتاب و مكسلين يدوروا على حد قرأ الكتاب و فهمه يسألوه و مكسلين حتى يفكروا ... فيسألوا اول واحد معدى جنبهم (من غير ما يتأكدوا هو مذاكر و لا لأ ... فاهم و لا لأ)
فى ناس تانية بقى سايبة ورقة إجابتها خالص ... ابيض زى الفل و عمالين يبصوا فى ورق الخلق ل و يصححوا كمان !!!
فلان ده جاوب صح فلان ده جاوب غلط فلان ده نص نص فلان ده لسه مجاوبش ... فلان ده اتسحبت ورقته و لسة مكتبش !!!
يا ستاذ احب افكرك ان ورقتك ممكن تتسحب فى اى وقت ... من غير متعرف انت امتى ... الحق جاوب و اكتب و متنساش المنهج كله معاك ... فبص فى الكتاب دايما علشان تعرف تلاقى الاجابة الصح فى الوقت المناسب !!!
نصف الراحة عدم مراقبة الآخرين
فكرة المقال كانت عندى و اضفت اليها من بعض ما كتبت اختى الفاضلة م. إنجى فودة و كان للاستاذ يحيى الابراشى الفضل فى كتابته الان حيث كان هو الدافع لى لان اصيغ الفكرة بعد حوار طويل و ممتع معه اليوم.
شكرا لكما
م. سالى محمد غانم
24-11-2013
ليست هناك تعليقات:
إرسال تعليق