خلاص ... لا لسة

بمناسبة الفلانتين و الهدايا و الدباديب و العزايم و الورد و ... و   و   و

لقيت انى شايفة مشاهد حب عبقرىة ... مش عارفة ازاى ممكن مخرج يتخيلها

بصوا معايا و كل واحد يرسمهم براحته

المشهد الاول:

الزوج: تحبى تتفرجى يا حبيبتى على لعب الناس دى
الزوجة: ايوة
 الزوج:  طب تعالى اشيلك عشان تتفرجى براحتك من غير ما حد يشوفك
 الزوجة:  طيب
و بعد فترة
 الزوج : ها يا حبيبتى كفاية كده؟
الزوجة: لأ لسة عايزة اتفرج تانى
 الزوج : طيب يا حبيبتى


المشهد الثانى:
 الزوجة: بتحبنى؟
الزوج: حبك كالعروة الوثقى ... حبك زى الربطة القوية المربوطة كويس قوى ... مربوطة جامد جدا
بعد سنوات من الزواج
 الزوجة:  ايه اخبار الربطة؟ كيف حال العروة الوثقى؟
الزوج على حالها لم تتغير


المشهد الثالث:
الزوج: تسابقينى؟
 الزوجة: ايوة
الزوج: طب يلا ....
سبقت الزوجة :)
بعد سنوات
الزوج: تسابقينى؟
الزوجة: ايوة
الزوج: طب  يالا .... فسبق الزوج

شفتى بقى واحدة بواحدة :) فاكرة المرة اللى فاتت:)

المشهد الرابع:
الزوجة تشرب ... فياخذ الزوج الكوباية و يدور على المكان اللى شربت منه الزوجة عشان يشرب منه بعدها :) منتهى الرقة و الدلع

المشاهد كتييييييييييير قووووووووووووى خايفة انسى حاجة

لأ و ايه امتى كانت المشاهد دى؟؟؟؟؟

من 14 قرن فى الصحراء ... مش فى اوروبا و لا امريكا و لا تركيا

فى شبه الجزيرة العربية ... فى بيت حبيبى و الزوجة هى حبيبتى الجميلة الدلوعة

اللهم صلى و سلم و زد و بارك على حبيبك خير الخلق كلهم و على آله و صحبه و سلم

بقلم م. سالى محمد غانم
7-2-2013